ka makau

Ua ʻOhi ʻo Pacific Biodiesel i ka Meaulu Mua Loa

I ka mōhala ʻana o ka meaulu nānālā mua loa a Pacific Biodiesel i kēlā kau kupulau aku nei, kāhāhā lākou i ka nui o ka hoihoi o ka lehulehu ma ka pūnaewele puni honua. “I ko mākou hoʻomaka ʻana e kanu i nā pua nānālā, ʻaʻole mākou i ʻike e ʻume ana paha ia hana i nā malihini, akā, pēlā nō,” i ʻī ai ka luna hokona ʻo Joy Galtro. “Ua wehe nā pua nānālā i kekahi puka hou.” Hele mai nā malihini e paʻi kiʻi iā lākou iho me nā pua nālālā ma ke kāʻei kua, a ma muli o kēia, hiki iā Pacific Biodiesel ke hoʻomaka e kamaʻīlio i ke kaiaulu e pili ana i ka mākaukau o nā pua nānālā i nā mea like ʻole a me ke ʻano o ka ʻoihana mahiʻai i kēia mua aku ma Maui nei.

Mai ka lā 2 o Mei, ua hoʻomaka ʻo Pacific Biodiesel e hana i nā mākaʻikaʻi ma ko lākou ʻāina. Ma ʻApelila, ua hoʻomaka ʻo Pacific Biodiesel iā Kuleana--ko lākou mau mea mālama ʻili--a i kēia kauwela, ua hoʻokumu lākou i nā ʻaila kuke a me nā ʻaila pale lā me ka ʻaila pua nānālā, he mea maikaʻi no ka palekana o ka ʻāpapapa. He kōkua kēia mau mea iā Pacific Biodiesel e hoʻomau i ka hana ʻana i nā wāhie, a hōʻike ʻia ka maikaʻi o nā pua nānālā no ia hana. “ ʻAʻole pono e hoʻokūkū ka mea ʻai a me nā wahie,” i ʻī ai ʻo Kelly King, ka hope pelekikena a lālā o ka ʻAha Kalana o Maui.

Ua hoʻomaka ʻo Pacific Biodiesel i 23 makahiki aku nei, a mau nō ko lākou “hoʻololi ʻana i nā manaʻo kūʻē kahiko,” i ʻī ai ʻo King. ʻO kekahi kumu no nā manaʻo kūʻē, ʻo ia hoʻi, i ka wā kahiko, ua hoʻohana nā poʻe i nā ʻaila kuke no ka wahie. Ua hoʻokomo lākou i loko o ko lākou ʻenekini, “a ua maikaʻi no kekahi mau mahina a laila e pīlali ana,” i ʻī ai ʻo King. ʻO ke kanu ʻana i ka meaulu e hoʻopili i ka mea ʻai, ka wahie, a me ka ʻenehana, he mea ʻume i ka hanauna hou. ʻO nā limahana o Pacific Biodiesel, piha nā makahiki ma lalo o 40 i ka hapanui o lākou.

ka makau