ka makau

Hōʻemi ʻia ka nui o nā koholā i ʻike ʻia ma nā mokupuni o Hawaiʻi. Wahi a nā kānaka noiʻi, ʻaʻole lohe ʻia ka hīmeni ʻana o nā koholā e like me ka mau. Eia kekahi, kilo lākou i ke emi o ka pilina o nā koholā makuahine-koholā keiki i nā makahiki 3 i hala. I loko nō o kēia kū i ke au, ʻaʻole i komo ka hopohopo i loko o nā kānaka Akeakamai i kēia manawa. “Mau nō ka nui o nā koholā ma ʻō,” i ʻī ai ʻo Ed Lyman, he limahana ʻo ia no Hawaiian Islands Humpback Whale National Marine Santuary.

Ua ʻike mua ʻia kēia kū i ke au ma ka mahina ʻo Kēkēmapa i ka makahiki 2015 e nā hui mākaʻikaʻi nānā koholā. Ua nānā lākou i ke emi o nā koholā i ia makahiki ma mua o ka makahiki aku. Pēlā nō me nā hui mākaʻikaʻi nānā koholā ma nā mokupuni ʻē aʻe.  Koho ʻo Rachel Cartwright, kekahi kanaka noiʻi koholā ma Maui, i ke emi o ka nānā koholā ma ka 80% i nā makahiki 5 i hala.

Wahi a Marc Lammers, ka luna noiʻi o National Oceanic and Atmospheric Administration a he loea ʻo ia i nā kani koholā, ua hāmau ka hīmeni ʻana o nā koholā kāne i nā mele. “I kēlā me kēia makahiki”, i ʻī ai ʻo ia, “e hele ka ‘elemākule, nā luahine, a me kamali‘i a moe i ke ala ‘a‘ohe mea nana e ho‘opilikia. Ke emi nei nā kani o ka hīmeni ʻana ma nā wahi a mākou e ʻoki leo ana.”

ʻAʻole maopopo i ke kumu o ke emi ʻana, akā aia kekahi mau manaʻo. Wahi a Cartwright, maliʻa paha, ua hoʻopilikia ʻia ka nui o nā mea ʻai ma nā kai o ʻĀlaka ma muli o 3 hanana hoʻomehana kai ma nā makahiki liʻiliʻi i hala. Inā ʻaʻole lawa ka mea ʻai, ʻaʻole i hiki i nā koholā ke neʻekau mai ʻĀlaka a i Hawaiʻi a hoʻi. ʻImi nā koholā i nā kai ma Hawaiʻi no ka mea ʻaʻohe naiʻa kila, akā, ʻaʻole lākou ʻai ma ʻaneʻi, i wehewehe ai ʻo ia.

“ ʻAʻole makemake mākou e hoʻohuikau i ka manaʻo o ka pau ʻana o nā koholā,” i ʻī ai ʻo Lammers. “Mau nō ka nui o nā koholā e neʻekau i Hawaiʻi. ʻO ia paha e loli ana kēia kū i ke au i kēia kau e hiki mai ana,” i ʻī ai ʻo ia, “I kēia manawa, ʻaʻole hiki ke ʻike leʻa.”

Ua Nalowale Nā Koholā

ka makau