ka makau

Ua hili ʻo Mana Lau i ke kinipōpō e kōkua iā Hawaiʻi e lanakila i ko lākou kūlana ʻekahi mua o ka Little League World Series i loko o ʻumi makahiki. I kona kaʻapuni ʻana i nā pahu, holo kona mau hoakime, i alakaʻi ʻia e ka mea nou ʻo Kaʻolu Holt, e ʻākoakoa ma ka pahu home. “He keu a ka maikaʻi,” i ʻī ai ʻo Holt, “no ka mea ua ʻike mākou i ka paʻakikī e hili i ka nou ʻana a kēlā mea nou.” Ua nou maikaʻi ʻo Holt me ka hoʻokuʻu ʻana i 2 hili wale nō e alakaʻi iā Hawaiʻi e lanakila ma ka helu ʻai 3-0 ma ka hoʻokūkū kahului o ka Little League World Series—ka manawa mua mai ka makahiki 2002 e hoʻokuʻu ʻole i kekahi helu ʻai ma ka hoʻokūkū kahului. ʻO kēia ka manawa mua o ka nou ʻana o Holt i ka hoʻokūkū piha.

“Nīnau mai kekahi, he aha ka ikaika o ke kime, a pane au, pāʻani mākou me he kime la,” i ʻī ai ke kaʻi ʻo Gerald Oda. “Nou ʻo Kaʻolu a i ʻole nou ʻo ʻAukai (Kea), hili ʻo Mana i ka ʻai puni, kūlia lākou a pau i ka nuʻu.” ʻO ke anaina hoʻi, peʻahi lākou i nā lāʻī no ka pōmaikaʻi, kāhea lākou, “Ho-no-lu-lu!” a me “U-S-A!”

ʻO kēia ka manawa mua i lanakila ai kekahi kime mai Hawaiʻi i ka Little League World Series mai ka makahiki 2008. ʻO Hawaiʻi kekahi o ʻehiku mau mokuʻāina o ʻAmelika Hui Pū ʻIa i lanakila i ke kūlana ʻekahi no LLWS i 3 a ʻoi manawa.

Ka Poʻokela o ka Honua

ka makau