ka makau

Ua hōʻea mai nā malihini a me kō ʻoneʻi poʻe mai ka moku o Keawe a i Niʻihau o Kahelelani ma Hawaiʻi Volcanoes National Park ma ka lā 22 o Kepakemapa no ka hāmama hou ʻana o ia wahi. Ma lalo o kekahi mau hola liʻiliʻi i piha ai kahi kūkulu kaʻa ma Kīlauea Visitor Center. Ua hoʻokū kaʻa ʻia nā kaʻa ma ke alanui ʻo Crater Rim Drive a hele wāwae nā poʻe pāhaneli i kekahi lua pele kokoke i nā puale o ka pāka e hālō. ʻAʻole i hiki naʻe ke ʻike i ka ʻā pele mai ka pāka, a pani ka hale hōʻikeʻike ʻo Jaggar ma muli o ka pōʻino o ke ōlaʻi.

Ua hoʻopani ʻia ka hapanui o ka pāka e ka luaʻi pele ma ka lā 11 o 2018, a paʻa mau i 134 mau lā i ka hoʻokahe ʻana o ka pelemaka i waho o ke kiʻowai ma lalo o ka puʻu a puka aku ma nā māwae ma Leilani Estates ma kahi o 20 mile ma ʻō aku. Ua luku ʻia ma kahi o 700 a ʻoi hale a uhi ʻia ka ʻāina he 6,000 mau ʻeka. Ma mua, he 280 kapuaʻi ka hohonu, i kēia manawa, he 1,700 kapuaʻi ka hohonu.

Hāmama Hou ʻo Hawaiʻi Volcanoes National Park

 

Pau Puna ua ko‘ele ka papa

Lauahi Pele i kai o Puna, one ‘ā kai o Malama.

Weliweli Puna i ke akua wahine.

Ka wahine ‘ai honua.

Maka‘u ka hana hewa i ka uka o Puna

Akua lehe ‘oi.

-- ‘Ōlelo No‘eau --

ʻO Pele ke akua wahine o ke ahi a ke kaikamahine o Haumea, ka makuahine honua. Wahi a Lilikala Kameʻeleihiwa, kekahi polopeka ma Kamakakūokalani Center for Hawaiian Studies, he akua ʻo Pele, he uhane kapu o ke kumumea honua.

Wahi a nā kaʻao, ua hānau ʻia ʻo Pele ma Kahiki, akā, ma hope o ka hoʻoinaina ʻana i kona kaikuaʻana, iā Nāmakaokahaʻi, ke akua o ka moana, ua mahuka ʻo Pele iā Kahiki no kekahi home hou. “Ua ʻimi hele ʻo ia i wahi e ʻeli ai i ka lua ahi no kona home,” i wehewehe ai ʻo Kameʻeleihiwa, “a loaʻa ma kekahi mokupuni, ma ka lua ʻo Kīlauea.” I kekahi manawa, i ʻōlelo ai ʻo Kameʻeleihiwa, pono ʻo Pele e hoʻomaʻemaʻe i ka ʻāina.

“No Pele kēia ʻāina,” i ʻī ai ʻo Kameʻeleihiwa, “a pono mākou, nā mamo o nā akua a me ka ʻāina, e noho pū me nā kumumea a me ka ʻāina me ke lōkahi.”  Ma ka hopena o ka lā, e lawe ana ʻo Pele i nā mea e pono ai ʻo ia. “Ke luaʻi pele ʻo Pele, manaʻo mākou, ke hula nei ʻo ia,” i ʻī ai ʻo Kameʻeleihiwa. Wahi āna, ʻo ka nui o nā ōlaʻi ka nahunahu o Pele. “Ke hānau nei ʻo Pele i ka ʻāina.”

ʻO Wai ʻo Pele?

ka makau