ka makau

E Hoʻomalu i Nā ʻĀpapapa o Hawaiʻi

Ma ka lā 1 o Mei, 2018, ua ʻāpono ʻia ka pila SB 2571 e ka ʻahaʻōlelo kau kānāwai. Ua hoʻokumu ʻo Kenekoa Mike Gabbard i kēia pila. Na kēia pila e pāpā i ke kūʻai ʻana aku i nā ʻaila pale lā me ka oxybenzone a me / a i ʻole ka octinoxate i loko. ʻO ia nā kemikala i hiki ke hoʻopilikia nui i ke kaiapuni o ke kai, ʻo ia hoʻi ka ʻāpapapa, kahi e hoʻomalu ai i ke kahakai o Hawaiʻi.

“ ʻIke ʻia ka hopena maikaʻi a puni ka honua ma muli o SB 2571,” i ʻī ai ʻo Gabbard. Ma ka lā 21 o Mei, ua ʻāpono ʻia kekahi ʻōlelo hoʻoholo ʻano like e ka Caribbean island of Bonaire e pāpā i ka hoʻohana ʻana i nā ʻaila pale lā me nā kemikala hoʻopilikia. Ke noʻonoʻo nei kekahi mau aupuni ʻē aʻe o ka honua e hoʻokumu i nā kānāwai like, i ʻōlelo ai ʻo ia. Akā nō naʻe, ʻaʻole paha he hoʻohiki ka SB 2571 i ka hoʻomalu ʻana i nā ʻāpapapa. Pili kēia kānāwai i ke kūʻai ʻana ma Hawaiʻi nei wale nō. Hiki i nā malihini ke lawe mai i nā ʻaila pale lā i kūʻai ʻia ma ka ʻāina ʻē. Hiki pū ke ʻoka i nā ʻaila pale lā ma ka punaewele mai nā hale kūʻai ʻaina ʻē.

“ ʻO ka hoʻonaʻauao ka mea koʻikoʻi,” i ʻī ai ʻo Gabbard. E ola ana kēia pila ma ka lā 1 o Ianuali, 2021, akā, ke paipai nei nā poʻe kākoʻo o kēia pila i ka lehulehu e koho i nā ʻaila pale lā hoʻopalekana ʻāpapapa i kēia manawa ma mua o ke kali ʻana a ola kēia pila.

ka makau
  • E kaomi ma ʻaneʻi e ʻike i ka papa inoa o nā ʻaila pale lā hoʻopalekana ʻāpapapa ma Hawaiʻi nei.
  • Eia kekahi, aia ka papa inoa o nā hale kūʻai ma Hawaiʻi e kūʻai aku i nā ʻaila pale lā hoʻopalekana ʻāpapapa.
  • E ʻike i kekahi o nā hui mākaʻikaʻi e kākoʻo i nā hana hoʻopalekana ʻāpapapa.